Ниэп-гаас эйгэтэ

Ааспыт сылга, Ленскэй оройуонун дьаhалтатын отчуотуттан сирдэттэххэ, бyддьyеттэригэр, «Сургутнефтегаастан» - 446 млн солк, «Сила Сибири» ситимиттэн - 251 млн солк, «ИСТА» ситимиттэн – 68,7 млн. солк киирбит. 

unnamed

Ыаллыы сытар Ленскэйгэ, ньиэптэн уонна гаастан, бу оройуон туhатыгар киирэр yп-харчы, Мииринэйтэн быдан балысхан.

2015 сылы кытары холоотоххо, 2016 сылга, Ленскэй оройуонун хааhыната 19 бырыhыан улаата охсубут.

Ол суотугар тутуу арааhын ыытан эрэллэр.

Сып-сырдык, дьэрэкээн паннолардаах О5о поликлиникатын, кэрэ диэн бэйэлээх дьыссааты, монолит-каркаас моhуоннаах олорор дьиэ арааhын туттулар.

Ленскэйдэр, ким-хайа иннинэ компьютер томографтаннылар(МРТ).

Биhиэхэ, Мииринэй оройуонугар, 11 ниэп-гаас тэрилтэтиттэн, манна холоотоххо дуона суох тyhээн киирэр.

Мииринэй оройуонун отчуотугар сигэннэххэ, 14 бэдэрээттээх тэрилтэттэн оройуон бyддьyетyгэр – 8,5 млн, нэhилиэктэргэ – 3,4 млн. солк эрэ киирбит.

Мииринэйгэ баар ниэптээниктэр уонна газовиктар, нолуоктарын, тyhээннэрин атын уобаластары кытары yллэстэллэр.

Кэскиллээх тутууларга, тыыппалаах бырайыактарга кытта иликтэр.

Социальнай эбийиэктэр

unnamed 1 Быйыл саас, 1964 сыллаахха тутуллубут, эргэрэн сууллуох айылаах «Харысхал» О5о Киинин оннугар аныгылыы тутуу бастакы сыбаайата тyстэ (фото). Тутууну «АЛРОСА» толорутук yбyлyyрэ былааннанар. Бу – балачча суумма. Тутууну «Строймонтаж2002» тэрилтэ ыытар. Бэдэрээччит тэрилтэ – «Востокстройкомплектация».

Эбийиэк, 2018 сыл ахсынньытыгар бyтэрэ былааннанар.

Аны, атын боппуруос. Мииринэй роддомун бэрдэ суох усулуобуйатын куорат барыта билэр. 60-с сыллар тутуулара.

Билигин, МЦРБ саламтатын туруорсуутун учуоттаан, Мииринэй куорат балыаhатын роддомун дьиэтин тутуутун бырайыактыыр-чинчийэр yлэлэрэ ыытыллан эрэллэр.

Мииринэй политехническэй институтун дириэксийэтин туруорсуутунан, 200 миэстэлээх устудьуоннар уопсайдарын тутуута былааннанар.

Ол эрэн бу боппуруос, Саха сирин бырабыытылыстыбата хайдах манна сыhыаннаhарыттан, сyрyннyyрyттэн улахан тутулуктаах.

Мииринэй оройуонун социальнай эбийиэктэригэр харгыс тахсыбыта – баар дьыала.

Ол курдук, 2015 сылтан ыла, субу тутуллуох «аатырбыт» Алмазнай 200 миэстэлээх орто оскуолатын тутуутун 2019 сылга кеhердyлэр.

Заречнайга 190 миэстэлээх дьыссаат тохтотуллан хаалбыта хаhыс да сыла.

МПЖХ

unnamed 2 

Мииринэй оройуонун ДЬХХ иннигэр иэhэ олус улахан. 100 млн.солк. тахсыбыта ыраатта.

Саамай элбэх иэс Мииринэй уонна Удачнай куораттарыгар баар эбит.

МПЖХ(Мииринэй к. ) ДЬХХ yлэтин салайар хампаанньа, хоммунаалка иhин улахан иэстээх дьоннору уодьуганныырга кэккэ миэрэлэри ыларга кyhэллэн эрэр.

Бастакыта – итии ууну араарыы, канализацияны бопторуу. Домофоны, хаабыл тэлэбиидьэнньэтин араарыы. РКЦтан ыспараапкалары биэрэргэ аккаас.

Иккиhэ. Суут бириистэптэринэн иэстээх-кyyстээх дьон, арассыыйа таhыгар тахсыылара тохтотуллар. Хамсаабат баайын туура тутан ылыы.

Баанын каарталарын харгыстааhын.

Бу да yрдyнэн, иэстэрин-кyyстэрин саба охсо сатааччы элбээбэтэ.

Биричиинэтэ биир – олус элбэх дьон кыбартыыраларын атыттарга тyyлэhэн олороллор. Бэйэлэрэ – «материкка» эбэтэр атын дойдуларга барбыттара быданнаабыт.

Мииринэй авиапредприятиета

unnamed 3

Мииринэй Арассыыйа 12 куораттарын кытары салгын суолунан сибээстээх. 

Оттон кэнники сонуммут диэн, аэропуорт баксааллыын «Аэропорты Севера» федеральнай тэрилтэ бас билиитигэр бараары олорор.

Маны сэргэ, олохтоох авиацияны «Якутия» авиакомпанияны кытары холбуур барыл баар буолбут. Ол тугунан диэлийиэн ким да билэ соруммат.   

Билигин, «АЛРОСА-авиа» Арассыыйа авиахампаанньаларын кэрискэтигэр 35-с миэстэни ылар.

Светлэй

unnamed 4 Светлэй сэлиэнньэтэ, Саха сирин ыччатын ортотугар, биир кэрэхсэбиллээх, инникигэ эрэллээх индустриальнай техникум баар сиринэн биллэр.

Светлэй индустриальнай техникумун биллэриилэриттэн сирдэттэххэ, бу тэрилтэ yлэhиттэргэ наадыйар эбит.

Ол курдук, повар, биэкэр, Чэбдигирдэр Киин yлэhитэ(бассыайын), Эрэсиим дьуhуурунайа, Yлэ харыстабылын отделын начальнига, муоста сууйааччылар(2) курдук идэлэринэн yлэ миэстэлэрин таhаарбыт.

Бэлиэтээн эттэххэ, Светлэйгэ yлэ боппуруоhа соччото суох.

Yгyс дьон, Светлэйтэн(Мииринэйтэн 70 биэрэстэ) «уунан» yлэлииллэр.

Эдэр yлэhиттэр

unnamed 5 Эдэр дипломнаах дьон, чуолаан Саха сирин иhиттэн, Мииринэй оройуонугар кэлиилэрэ сылтан сыл ахсын аччаан иhэр.

1998-2007 сылларга, балаhыанньа арыый да аматык этэ. Холобурдаан эттэххэ, 2005 сыллаахха оройуон педагогическай салаата 34 эдэр yлэhиттэммитэ. Билигин хартыына соччото суох.

Ордук математика, черчение, физика, география уонна биология учууталлара тиийбэттэр.

Педагог эр дьон сэдэхсийдилэр.             

Бу туhаайыыга бастакы биричиинэ – дьиэ-уот тиийбэтэ.

Учууталларга анаан-минээн таас да мас да уопсайдара суох.

Эгэ кэлэн кыбартыыра биэриэхтэрэ дуо?!

Маны учуоттаан, оройуон дьаhалтата сытыы боппуруоhунан ыкса дьарыктанара уолдьаста.

Сyлдьyкээр

unnamed 6 Алмаастаах кыраай кииниттэн чиэски сытар дэриэбинэ эдэр yлэhиттэргэ тупсарыылаах олорор дьиэни туттарарга туруорсар.

Уопсайынан да, Сyлдьyкээр сэлиэнньэтин дьиэлэрэ биллэ эргэрдилэр. Манна сылдьыбыт киhи хараастар балаhыанньата.

Билигин, Саха сирин хаарбах дьиэлэрдээх нэhилиэнньэлээх пууннарын испииhэктэригэр Сyлдьyкээр биир бастакынан турар.

Балаhыанньаны тупсарарга, нэhилиэк дьаhалтата туруорсубута ыраатта да оройуон бу туhаайыыга нэс быhыылаахтык yлэлии олорор.

Оройуон сэбиэтин дьокутааттара бу боппуруоhунан ыкса дьарыктаныах буолбуттара баара да дьыалатыгар сорунуулаах хардыы мэлигир.

2012 сыллаахтан ыла, «Светлэй-Сyлдьyкээр» айан суол тутуллуох буолбута.

2017 сыл ортолоото да туох да хамсааhын суох.

Удачнай

unnamed 7 Быйылгыттан ыла, Удачнайга, Дьокуускай медицинскэй колледжын филиала yлэлээн барыахтаах. Манна, орто кэрдиис эмп-том салаатын yлэhиттэрин – сиэстэрэлэри бэлэмниэхтэрэ. Сиэстэрэ идэтигэр уhуйулларга балачча сайаапка киирдэ. Кылаабынайа, идэ ылааччылар, миэстэтигэр  -Удачнай куоратын балыаhатыгар yлэнэн хааччыллыахтара. 

Станислав Алексеев

Мииринэй куорат.

 

 

Поделиться:

Комментарии

0 Зема 20.07.2017 08:01
СТАНИСЛАВ, кытаат!
Ответить
0 Дьэллик 03.08.2017 14:23
Сулдьукээрдэри паддежжкалыахха наада этэ.
Ответить