3 монографиялаах, 15 үөрэх пособиелардаах, Уһук Хоту сиргэ түбүркүлүөс курдук ыарахан ыарыыны сиһилии үөрэтэн аан дойду наукатыгар бөдөҥ кылаатын киллэрбит, Аан дойдутааҕы трезвость академиятын вице-президенэ, физкультураны уонна спорду кытта ыкса доҕордуу, чөл, чэгиэн-чэбдик олох университетын төрүттээччитэ уонна ректора, тыһыынчанан лекциялары аахпыт трибун, талааннаах араатар, Саха сирин 200-тэн тахса нэһилиэктэрэ арыгыны атыылааһынтан аккаастаналларын тэрийбит, Саха Өрөспүүбүлүкэтин духуобунаһын Академиятын академига Карл Георгиевич Башарин киэҥ эйгэҕэ бэрт үчүгэйдик биллэр.

Ааспыт нэдиэлэҕэ “Саха киэн туттар дьоно” сериянан тахсыбыт “Карл Георгиевич Башарин” диэн саҥа кинигэ сүрэхтэниитин мэдэссиинэ институтун дириэктэрэ, мэдиссиинэ наукатын кандидата Гоголев Николай Михайлович салайан ыытта.

630 страницалаах кинигэни Карл Георгиевич Башарин кэргэнэ, филологическай наука доктора, профессор Зоя Константиновна Башарина, кыргыттара, лингвистика философиятын доктора Ольга Карловна Башарина, филологическай наука кандидата Анна Карловна Башарина хомуйан “Айар” кинигэ кыһатыгар таһаартардылар. Кинигэ иитэр-үөрэтэр, өйдөтөр суолтата сүҥкэн.

Уһулуччулаах учуонай, арыгылааһыны утары күүстээх уонна утумнаах үлэни ыыппыт, чэгиэн-чэбдик олох тулхадыйбат пропагандиһа Карл Георгиевич Башарин сырдык олоҕун, айар үлэтин үөлээннээхтэрэ, мэдиссиинэ институтун преподавателлэрэ, студеннар, доҕотторо, биир дойдулаахтара, дьиэ-кэргэнэ киэҥник арыйдылар истиҥ-иһирэх ахтыылары оҥордулар. Кинилэр ортолоругар: Ил Түмэн бэрэссэдээтэлэ Алексей Ильич Еремеев; РФ уонна Саха Өрөспүүбүлүкэтин үтүөлээх деятелэ Андрей Саввич Борисов;

Россия государственнай уонна общественнай деятелэ, педагогика доктора Евгения Исаевна Михайлова; Саха Өрөспүүбүлүкэтин доруобуйатиын харыстабылын миниистир солбуйааччы Татьяна Юрьевна Павлова; саха норуотун суруйааччыта Николай Алексеевич Лугинов, мэдиссиинэ наукатын доктора, анатомия кафедратын профессора Алла Борисовна Гурьева; “Чөл олох” общественнай фондатын дириэктэрэ Елена Ивановна Шудря; Чурапчы улууһун баһылыга Степан Анатольевич Саргыдаев, “Георгий Прокопьевич Башарин” аатынан Сылан орто оскуолатын дириэктэрэ Лидия Михайловна Сивцева, РФ уонна Саха Өрөспүүбүлүкэтин үтүөлээх бырааһа, Саха Өрөспүүббүлүкэтин бочуоттаах олохтооҕо Земфира Макаровна Кузьмина; РФ уонна Саха Өрөспүүбүлүкэтин доруобуйаҕа харыстабылын туйгуна, РФ профессиональнай үөрэхтээһинин бочуоттаах үлэһитэ Елена Дмитриевна Колодезникова умнуллубат түгэннэри кэпсээтилэр.

Башариннар кыргыттара, лингвистика философиятын доктора Ольга Карловна Башарина; филологическай наука кандидата Анна Карловна Башарина, Карл Георгиевич Башарин кэргэнэ, филологическай наука доктора, профессор Зоя Константиновна Башарина, махталларын биллэрдилэр.

Карл Георгиевич Башарин олоҕун, айар үлэтин бүтүннүү наукаҕа, бар-дьон чэгиэн туруктаах буоларын туһугар анаабыта. Киһи быһыытынан болҕомтону тардар ураты өрүттэрдээҕэ. Физкультуранан, спордунан дьарыктанара, үрдүк тырыбынаттан дорҕоонноохтук хоһооннору ааҕан чаҕылыҥнатара, Россия уонна Саха сирин Гимнэрин ыллаан сөхтөрөрө, дьону кытта кэпсэтэригэр санаатын таптардаҕына эрчимнээхтик күлэн лаһыгыратара. Кинини кытта чугастык алтыспыт дьонун сүргэлэрин көтөҕөрө, инникигэ кынаттыыра, күлэн-үөрэн сэргэхситэрэ.

Мэдиссиинэ учуонайа, институт преподавателэ, общественник, арыгы-табах киһи доруобуйатыгар буортутун билэн, арыгылааһыны утары охсуһууну төрүттээбит, бэртээхэй доҕор, иллээх дьиэ-кэргэн амарах аҕата, эйэҕэс эһээтэ, Карл Георгиевич Башарин хаалларбыт этиилэрэ, идеялара кини туһунан тахсыбыт дьоһун кинигэтинэн салҕаналлар.

Баһылай Посельскай